Pars Today

14-15 қыркүйекте Нұр-Сұлтан қаласында Әлемдік және дәстүрлі діндер көшбасшыларының VII съезі өтуде. Іс-шараға әлемнің 50 елінен 100-ден астам делегация, соның ішінде ислам, христиан, иудаизм, синтоизм, буддизм, зороастризм, индуизм және басқа да діндердің өкілдері қатысуда. Биылғы съезд «Пандемиядан кейінгі кезеңдегі адамзаттың рухани және әлеуметтік дамуындағы әлемдік және дәстүрлі діндер көшбасшыларының рөлі» тақырыбына арналды.

VII съездің ашылуына Қазақстан Президенті Қасым-Жомарт Тоқаев қатысты.

Рим Папасы Франциск Қазақстанға мемлекеттік сапары аясында съезд жұмысына қатысуда. Бұл Рим Папасы Иоанн Павел II 2001 жылдың қыркүйегінде елге сапармен келгеннен кейінгі католиктік шіркеу басшысының Қазақстанға бірінші сапары.

Рим Папасы Францисктің Қазақстанға сапары

Рим Папасы Францисктің Президент Тоқаевпен кездесуі

• Қазақстан астанасындағы халықаралық әуежайда Рим Папасы Францискті Президент Қасым-Жомарт Тоқаев өзі қарсы алды.
• Президент Тоқаев Рим Папасының сапарының тарихи маңызына тоқталып: «Биыл Қазақстан мен Ватикан арасындағы дипломатиялық қарым-қатынастың орнағанына 30 жыл толады. Сіздің сапарыңыз осы айтулы датамен тұспа-тұс келді. Біз бұл оқиғаға ерекше мән береміз, өйткені бүгінгі кездесу біздің ынтымақтастығымызды жаңа деңгейге көтеруге арналған».
• Рим Папасы Франциск Қазақстанның этносаралық және конфессияаралық диалогты ілгерілетудегі негізгі рөлін атап өтті.
• Рим Папасы сондай-ақ Қазақстанның Еуропа мен Азия арасындағы дәнекер ретіндегі маңыздылығын атап көрсетті. Ол Қазақстанның ядролық қарусыздануға, экологиялық саясатты дамытуға және көміртегі бейтараптығын сақтауға қосқан үлесін жоғары бағалайтынын білдірді.

Азаматтық қоғаммен және дипломатиялық корпуспен кездесу

• Президент Тоқаев пен Рим Папасы Франциск 13 қыркүйекте азаматтық қоғам және дипломатиялық корпус өкілдерінің алдында сөз сөйледі.
• Рим Папасы Франциск Қазақстанның өлім жазасын алып тастау туралы шешімін жоғары бағалады. Оның айтуынша, бұл әрбір адам үшін үміттену құқығы жолында адам өмірінің құндылығын растау болып табылады.
• Рим Папасы Франциск сондай-ақ «бізге халықаралық деңгейде халықтар арасындағы өзара түсіністік пен диалогты ілгерілете алатын және Хельсинки рухын, көпжақтылықты нығайтуға, неғұрлым тұрақты және бейбіт әлем құруға ұмтылысты, жаңа ұрпақтарға қамқорлық жасай алатын көшбасшылар қажет» деп мәлімдеді. »(Анықтама үшін: Хельсинки процесі Еуропа, Орталық Азия және Солтүстік Америкадан 57 мүше-мемлекетті қамтитын Еуропадағы қауіпсіздік және ынтымақтастық ұйымының дүниеге келуімен 1975 жылғы Хельсинки Қорытынды актімен қорытындыланды. 2010 жылғы желтоқсанда Қазақстан ЕҚЫҰ саммитін табысты өткізді. Қазақстан 1975 жылғы Хельсинки құжатын «жаңартуды» ұсынды.)

Қазақстан мен Қасиетті Тақтың ынтымақтастығы

• 14 қыркүйекте Қазақстан Премьер-Министрінің орынбасары – Сыртқы істер министрі Мұхтар Тілеуберді мен Ватиканның мемлекеттермен байланыстар жөніндегі хатшысы архиепископ Пол Ричард Галлахер мемлекеттер ынтымақтастығын арттыру мақсатында 1998 жылғы 24 қыркүйектегі Қазақстан мен Қасиетті Тақтың арасындағы өзара қарым-қатынастар туралы қол қойылған келісімге қосымша келісімге қол қойды.
•  Әлемдік және дәстүрлі діндер көшбасшыларының VII съезінің маңызды міндеттерінің бірі болып табылатын конфессияаралық келісім мен дінаралық байланысты нығайтудың маңыздылығын атап өтті.

Әлемдік және дәстүрлі діндер лидерлерінің VII съезі

Президент Қ.К.Тоқаевтың діндер өкілдерімен кездесуі

• Президент Тоқаев VII съезд қарсаңында 13 қыркүйекте халықаралық ұйымдардың өкілдерімен, дін көшбасшыларымен және діни университеттердің басшыларымен кездесті,
• Біріккен Ұлттар Ұйымының Өркениет Альянсының Жоғары өкілі Мигель Анхель Моратиноспен кездесу барысында тараптар Қазақстан мен UNAOC арасындағы болашақ ынтымақтастықты талқылады. М.Моратинос съездің биік деңгейде ұйымдастырылғанын жоғары бағалап, оның нәтижелері бейбітшілікті, келісімді және дінаралық диалогты нығайтуға ықпал ететініне сенім білдірді.
• Иерусалим Патриархы Теофил III бейбітшілік, келісім және өзара құрмет идеалдарын насихаттауда әлемдік көшбасшылардың рөлі өте маңызды екенін мәлімдеді.
• Қ.К.Тоқаев әл-Азһар университетінің Жоғарғы имамы Ахмед ат-Тайебпен кездесуінде діни білімнің маңыздылығына тоқталды. Ол Қазақстан университетті «ортақ дініміз – Ислам құндылықтарының нұрын тарататын шамшырағы» деп санайтынын айтты.

VII съездің ашылуы

• 14 қыркүйекте форумға қатысушыларды қарсы алған Президент Қ.К.Тоқаев Съезд жаһандық деңгейдегі өркениетаралық диалог алаңына айналғанын айтты.
• Рим Папасы Франциск съезде өзінің құттықтау сөзінде қазақтың ұлы ақыны және ойшылы Абай Құнанбайұлының «Адамгершіліктің бастауы махаббат пен әділдік» деген сөзін келтірді. Понтифик сонымен қатар қатысушыларды өткен күндердің сұмдықтары мен қателіктерін есте сақтауға шақырды.
• Біріккен Ұлттар Ұйымының Бас хатшысы Антониу Гутерриш қатысушыларға арнаған бейне үндеуінде Қазақстан үкіметінің VII Съезді өткізгенін жоғары бағалады.
• Конгрестің қорытындысы бойынша қатысушылар осы айда БҰҰ Бас Ассамблеясының 77-сессиясы барысында таратылатын декларацияны қабылдайды.

Дереккөзі: ҚР-дың ИИР-дағы Елшілігі