Израиль Газада атысты тоқтату бітімін тағы да бұзды
Палестина автономды құрылымына қарасты Уафа ақпарат агенттігінің хабарлауынша, Израиль күштері Газада атысты тоқтату бітімін тағы да бұзып, 7 палестиналыққа шабуыл жасады.
Уафа ақпарат агенттігінің хабарлауынша, Газа секторының солтүстігіндегі Бейт-Лахия ауданында орналасқан Индонезия ауруханасының айналасындағы үйлерінің жағдайын тексеру үшін барған бір палестиналық топ Израиль күштерінің шабуылына ұшырады. Атыс салдарынан 3 палестиналық жараланды.
Газа қаласының батысындағы Тель әл-Хави ауданында орналасқан Құдс ауруханасы маңындағы үйлердің жағдайын көруге барған басқа бір палестиналық топты бір израильдік мерген нысанаға алды. Осы атыс салдарынан 4 палестиналық жараланды.
Атысты тоқтату бітімі барысында Израиль күштерінің палестиналықтарға оқ атуы бірінші рет емес. Израиль күштері бітімнің алғашқы күнінде бірнеше палестиналыққа оқ атты. Соның салдарынан 2 палестиналық қаза тауып, басқа бірнешеуі жараланды. Бұл адамдар Газа секторының солтүстігіндегі өз үйлеріне қайтуға талпыныс жасаған болатын.
Жұма күні таңғы сағат 07:00 Газада атысты тоқтату бітімі жарияланды. Бітім 4 күнге созылады.
