Сирия Иран, Қазақстан мен Ресейдің Астана отырысында жасаған талпыныстарына алғыс айтты

«Әл-Ахбарие» телеарнасының хабарлауы бойынша,  Сирияның БҰҰ-дағы өкілі әрі Астана-4 келіссөздеріндегі Сирия үкіметі делегациясының басшысы Башар әл-Джафари Астана отырысында ілгерілеушіліктің болғанын айтып, осы отырыстарды өткізуді мойнына алған Қазақстан халқы мен үкіметіне алғысын білдірді.

Башар әл-Джафари, сондай-ақ, Ресей мен Иранның Сирияда халықтың қанының төгілуінің алдын алу, келіссөздер өткізудің жолын жеңілдету және Сирия дағдарысын саяси жолмен шешу үшін жасаған талпыныстарын мақтауға тұрарлық деп бағалады.

Сирияның БҰҰ-дағы өкілі Дамасктың Ресей тарапынан ұсынылған  «шиеленіс азайған» аймақтар туралы жобасымен келіскеніне тоқталып: «Сирия қантөгісті тоқтату және сириялық азаматтарды қолдау мақсатында елге тыныштықты қайтарып, аумақтық біртұтастығын сақтауды кепілдендіретін кез-келген жобаны қолдайды»,-деді.

Ресейдің жобасына сәйкес Сирия мен Түркия шекарасына жақын жердегі Идлиб облысының солтүстік-батысында, Хомс облысының орталығында, Дамасктың айналасының шығысы мен Сирия және Иордания шекарасының оңтүстігінде 4 қауіпсіз аймақ құрылады.