"Норман төрттігінің" басшылары Украинаның шығысында атысты тоқтату туралы бітім келісімін орнатуды сұрады
"Норман төрттігі" тобының басшылары – РФ, Франция мен Украина президенттері Владимир Путин, Эммануэль Макрон, Петр Порошенко және Германия канцлері Ангела Меркель бейсенбі күні ортақ мәлімдеме жариялап, төрт елдің Украинаның шығысындағы әскери қақтығысты шешу мақсатында Минск келісіміне берік болуы және оны қауіпсіздік, саяси, гуманитарлық және экономикалық салаларда жүзеге асыру қажеттігін қуаттады.
Төрт ел басшылары мәлімдемеде Украинаның шығысындағы дағдарысқа қатысты келісімдерді жүзеге асыруды тездетуге бағытталған барлық мүмкін жолдарды алдағы айларда қарастыратындықтарын баса айтты. "Норман төрттігі" басшыларының мәлімдемесі осы дағдарыс тараптарының өз ұстанымдарын табанды талап етуіне байланысты аймақты қазіргі тығырықты жағдайдан шығару мақсатында жарияланды. Бұл мәселе әсіресе Украинаның шығысындағы оппозициялық күштерді жаныштау үшін әскери жолды пайдаланып, бұл аймаққа әскери үстемдік орнату мақсатындағы Украинаның батысшыл үкіметінің жуырдағы әрекеттеріне байланысты маңызды болып отыр.
Ресейдің Еуропа кеңесінің ақпарат кеңсесінің басшысы Николай Топориннің айтуынша, Украинаның шығысындағы Донбастағы әскери қақтығыс пен оның шешу жолын табу қазіргі жағдайда Ресей үшін шынайы қиындық тудырып тұр.
Мәскеудің көзқарасы бойынша, 2018 жылы ақпанның жиырма төрті күні Украинада Донбастың қайта бірігуі туралы заңның іске асуы Киевтің батысшыл үкіметінің шынайы мақсатын растап, Украинаның шығысында қақтығыстардың қайта басталуына қажет жағдай тудырды. Порошенко бұл заңға қол қою арқылы шын мәнінде 2015 жылдың ақпан айында Украинаның шығысында атысты тоқтату туралы бітімді орнату мақсатында "Норман төрттігі" тобы тарапынан бекітілген Минск-2 келісімін елемейтінін көрсетті. Путиннің "Норман төрттігі" тобының жуырдағы мәлімдемесін жариялауға қатысуы оның Украинаның шығысындағы дағдарысты шешуге ықыласынан гөрі шартты әрекет болғанын айтуға болады.
Ресейдің жоғары лауазымды дипломаты Петр Ильичевтың айтуынша, Украинаға америкалық қару-жарақ жіберу бұл ел басшыларын Украинаның шығысында жаңа әскери қақтығыс тудыруға итермелейді. Мәскеудің көзқарасына сәйкес, Украинаның шығысындағы дағдарыстың жалғыз шешім жолы БҰҰ Қауіпсіздік кеңесі тарапынан расталған Минск-2 келісімін толық орындап, соны қадағалау болып саналады. Бұған қарамастан украиналық соғысқұмарлар бұл келісімнің күшін жоюды талап етіп отыр.
Донбастың қайта бірігуі туралы заңды жүзеге асыру Минск келісімін елемеу және Украинаның шығысындағы дағдарысты саяси жолмен шешуді шетке қалдыруға жол ашып, аймақта соғыстың пайда болу ықтималын арттырып отыр.
Ресейліктер қазіргі Киев үкіметін сырттан жоспарланған төңкерістің нәтижесінде билікті өз қолына алған үкімет санайды. Сол себепті олар келіссөздер жүргізудің орнына Украинаның батыс қолдаушыларымен келісімге келуді көздеп отыр. Ресей Киевтің еуропалық қолдаушыларымен, яғни Германия және Франциямен бір шешім жолын табу мақсатында алдағы "Норман төрттігі" форматындағы келіссөздерге белсенді түрде және жоғары деңгейде қатысады деп болжануда.
