Ұзақ қашықтыққа арналған «Хоррамшахр» зымырандық кешенінің тұсаукесер рәсімі өтті
Жұма күні ИИР Қарулы күштерінің Теһрандағы әскери парадында ұзақ қашықтыққа арналған «Хоррамшахр» баллистикалық зымырандық кешенінің тұсаукесер рәсімі өтті.
Иран Ислам революциясы Сақшылар корпусының әуе-ғарыш күштерінің қолбасшысы бригада генералы Амирали Хаджизаде осы зымырандық кешен жайлы айтқан сөзінде «Хоррамшахр» зымыранының 2 мың шақырымға ұшып, бірнеше соғыс оқтұмсығын тасымалдау қабілетіне ие екендігіне тоқталды.
«Қасиетті қорғаныс» апталығының алғашқы күні Теһрандағы ИИР-ның негізін қалаушы хазірет имам Хомейнидің кесенесінің маңы мен Иранның түкпір-түкпірінде Иран Қарулы күштерінің әскери парады өткізілді.
Иранның оңтүстігіндегі Парсы шығанағының көгінде Иран армиясы әуе күштері мен Ислам революциясы Сақшылар корпусының әуе-ғарыш күштерінің қырғи ұшақтары қалықтады.
Иран армиясы мен Ислам революциясының Сақшылар корпусы Теңіз күштерінің кемелері мен сүңгуір қайықтары да Парсы шығанағы мен Хормоз бұғазында Иран Қарулы күштерінің қуаты мен айбынын паш етті.
