Амир Абдуллахиан: Сақшылар корпусы Еуропа астаналарын ДАИШ шабуылдарынан құтқарды
Иран Сыртқы істер министрі Хұсейн Амир Абдуллахиан швед әріптесі Тобиас Билстреммен телефон арқылы сөйлесуінде еуропалықтардың Ислам революциясы Сақшылар корпусының лаңкестікпен күрестегі күш-жігеріне қарыздар екенін қуаттап: «Сақшылар корпусы Еуропа астаналарын ДАИШ шабуылдарынан құтқарды»,- деді.
Fars ақпарат агенттігінің хабарлауы бойынша, Хұсейн Амир Абдуллахиан Еуропарламенттің Ислам революциясы Сақшылар корпусына қатысты конструктивті емес ұстанымын қатаң сынай отырып, Швецияның Еуропа Одағына төрағалығы кезінде Еуроодақ пен ИИР арасындағы қарым-қатынастардың сындарлы жолмен жалғасатынына үміт білдірді.
Бұл телефон сұхбатында Швеция Сыртқы істер министрі өз елінің Еуропалық Одаққа төрағалық еткен кездегі Еуроодақ пен Иран арасындағы диалогты кеңейту жолындағы талпыныстарына тоқталды.
Тобиас Билстрем осы сұхбатында Еуропарламенттің сақшыларға қарсы жақында ұсынған түзетуі туралы: «Бұл қарар міндетті емес»,- деді.
