Pars Today

ИИР Президенті, Сыртқы істер министрі және олармен бірге болған делегация тікұшақ апатында шәһид болғаннан кейін халықаралық қайраткерлер мен тұлғалар Иран халқы мен үкіметіне көңіл айтты.

Иран Телерадио бірлестігі ақпарат агенттігінің мәліметінше:

Ресей Президенті Владимир Путин Ислам революциясының  жетекшісі мен Иран халқына Сейед Ибрахим Раиси мен оның серіктерінің шәһид болуына байланысты көңіл айтты. Бұл туралы Ресей Президенті Владимир Путиннің жолдауында былай деп айтылды: "Сейед Ибрахим Раиси бүкіл өмірін елге қызмет етуге арнаған көрнекті саясаткер болды. Оны жерлестері өте жоғары құрметтеп, шетелде айтарлықтай беделге ие болды. Ол Ресейдің шынайы досы ретінде елдеріміз арасындағы тату көршілік қарым-қатынастарды дамытуға жеке құнды үлес қосып, оны стратегиялық әріптестік деңгейіне жеткізуге көп күш жұмсады".

Пәкістан Премьер-министрі Шахбаз Шариф өз жолдауында тікұшақ апатында Сейед Ибрахим Раиси мен онымен бірге болған азаматтардың шәһид болуына көңіл айтып: «Пәкістанда Иран президенті мен оның серіктеріне құрмет пен Иранмен ынтымақтасу белгісі ретінде жалпыхалықтық аза тұту күні жарияланды",- деді. Шариф бір айдан аз уақыт бұрын Пәкістанның Иран президентін тарихи сапармен қабылдағанын айтып: «Пәкістанның туы ирандық қайраткерлердің шәһид болғанына қайғыру белгісі ретінде жартылай желбірейді",- деп сөзін жалғастырды.

Армения Президенті Ваагн Хачатурян тікұшақ апатына байланысты Иран президенті мен онымен бірге болған делегацияның шәһид болуына байланысты көңіл айтып: «Біз Иран халқының қайғысына ортақпыз және осы қиын кезеңде сабыр мен табандылық тілейміз",- деді.

БАӘ Президенті шейх Мұхаммед бен Заид Әл Нахаян Иран Президенті мен оның серіктерінің шәһид болуына байланысты жолдауында: «Біз Иран үкіметі мен халқына шын жүректен көңіл айтамыз және осы қиын уақытта Иранмен ынтымақтастығымызды атап өтеміз",- деп айтты.  

Мальдив аралдарының Президенті Мұхаммед Муизу да дүйсенбі күні осы оқиғадан  кейін өзінің X аккаунтында былай деп жазды: «Иран Президенті  Сейед Ибрахим Раисидің тікұшақ апатынан мезгілсіз қайтыс болуы маған қатты әсер етті.  Алла Тағаладан Иран Президенті Раиси, Сыртқы істер министрі Амирабдуллахиан және осы келеңсіз оқиғадан қаза тапқан басқа да құрбандардың рухтарына мейірім  тілеп, оларға жәннатты нәсіп етуін сұраймын".

Еуропа Кеңесінің төрағасы Чарльз Мишель Иран Президенті Сейед Ибрахим Раиси, Иран Сыртқы істер министрі Хұсейн Амирабдоуллахиан және   делегацияның басқа мүшелері мен тікұшақ экипажының басқа да мүшелерінің шәһид болуына байланысты көңіл айтып, қаза болғандардың отбасыларына жанашырлық білдірді.

Әзірбайжан Президенті Ильхам Әлиев рухани басшыға көңіл айтып, Раиси мен оның серіктерінің шәһид болуына байланысты терең әсер  алғанын айтып: «Иран халқы өмір бойы еліне адал қызмет еткен көрнекті мемлекет қайраткерінен айырылды. Оның есімі біздің жүрегімізде мәңгі сақталады",- деді.

Боливияның Президенті Луис Арсе өзінің X әлеуметтік желісіндегі   аккаунтында бұл Латын Америкасы елінің халқының осы қиын сәтте  Иран халқымен бірге екенін баса айтып, ол Жоғарғы Көшбасшыға, үкіметке, Иранның  ержүрек халқына және шәһидтердің отбасыларына көңіл айтты.

Катар Әмірі шейх Тамим Бин Хамад әл-Тани өзінің X әлеуметтік желісінде жариялаған хабарламасында былай деп жазды:  "Мен тікұшақ ауыр апатынан ИИР Президенті Ибрахим Раиси мен Сыртқы істер министрі Хұсейн Амирабдуллахиан мен олардың серіктерінің қайтыс болуына байланысты Иран үкіметі мен халқына көңіл айтамын".

Ливан Хизболласы мәлімдемесінде Иран президенті аятолла Раиси мен Сыртқы  істер министрі Хұсейн Амирабдуллахиан мен олардың серіктерінің азаппен шәһид болуына байланысты көңіл айтты: "Имам Заман (ғ.с.), аятолла Хаменеиге, әйгілі ғүламаларға, Ислам республикасының қайраткерлеріне, сабырлы Иран халқына, шәһидтердің отбасыларына және барша мұсылмандар мен әлемдегі азат адамдарға көңіл айтамыз".

Ливанда Иран президенті мен оның серіктерінің шәһид болғанын құрметтеу және Иранмен ынтымақтасу белгісі ретінде үш күндік жалпыхалықтық аза тұтылады.