Зариф Медине қаласындағы жарылысқа реакция білдірді
ИИР Сыртқы істер министрі Мұхаммад Джавад Зариф қасиетті Медине қаласындағы жарылысқа реакция білдіріп: «Лаңкестердің аттап өтпеген қызыл сызығы қалмады»,- деді.
«Фарс» ақпарат агенттігінің мәліметі бойынша, Мұхаммад Джавад Зариф сейсенбі күні «Твиттердегі» парақшасында: «Лаңкестердің аттап өтпеген қызыл сызығы қалмады. Сүннит пен шиіт мұсылмандар бірікпесе, екеуі де құрбан болады»,- деп жазды.
Бұдан бұрын Иран Сыртқы істер министрлігінің баспасөз хатшысы Бахрам Ғасеми де сол оқиғада құрбан болғандардың жанұяларына көңіл айтып: «ИИР сан рет әлемнің әр жеріндегі лаңкестіктің әр түрін айыптады. Барлық мемлекеттер шынайы жігермен бүкіл мүмкіндіктерін пайдаланып, оның тамырын жойып, себептері және орындаушыларына қатысты шара қолдануға міндетті»,- деп мәлімдеген болатын.
Дүйсенбі күні кешке Мединеде Пайғамбар мешіті (Масджид ан-Набави) және Сауд Арабиясының шығысындағы Катиф қаласындағы мешітке жақын жердегі жарылыстарда алты адам, соның ішінде төрт қауіпсіздік күші қаза болып, бес адам жарақат алды.
