Трамптың миграциялық саясаты жеңіліс тапты
Сан-Францисконың Аппеляциялық соты АҚШ үкіметінің Сиэтл соты шығарған үкімнің күшін жою және Трамптың 7 ислам елі азаматтарының елге кіруіне тыйым салу туралы жарлығын орындауды жалғастыруға қатысты берген өтінішін қабылдамады.
АҚШ-тың Калифорния штатындағы Сан-Франциско қаласының Аппеляциялық соты: «АҚШ үкіметі осы жарлықта аталған 7 мұсылман елінің бірде-бір азаматының АҚШ-қа қарсы лаңкестік шабуылдарға қатысы болғанын дәлелдей алмады»,-деп мәлімдеді.
Трамп бұдан бұрын бір жарлық шығарып, Иран, Сирия, Судан, Ливия, Йемен, Ирак пен Сомали елдерінің азаматтарына АҚШ-қа кіруге тыйым салған болатын. Алайда Вашингтон штатындағы Сиэтл федералды соты бұл жарлықты Конституцияға қайшы санап, оның бүкіл ел бойынша орындалу күшін жоюға дауыс берді. Бұған қарсы Трамп Сиэтлдың федералды судьясы Джеймс Робарттың үкімін заңға қайшы деп жариялап, бұл үкімнің күшін жою үшін Сан-Франциско Аппеляциялық сотына өтініш жазды.
Трамптың 7 ислам елі азаматтарының АҚШ-қа кіруіне тыйым салуға бағытталған шарасы тіпті ел ішінде де ауқымды қарсылыққа ұшырады. АҚШ-тың CNN телеарнасы жүргізген жаңа сауалнама нәтижесі бойынша, америкалықтардың 55 пайызы осы елдің жанжалды Президенті Дональд Трамптың антимиграциялық жарлығына қарсы. Сондай-ақ, Трамптың антимиграциялық жарлығы әлем бойынша реакциялар мен наразылықтарды тудырды.
Қарсыластар АҚШ Президентінің 7 ислам елі азаматтарының елге кіруіне тыйым салу туралы шешімін кемсітушілік сипаттағы, дінге, адамгершілік пен ақлаққа қарсы әрі халықаралық заңдарға қайшы деп атады. Олардың сенімінше, елді қорғау үшін ислам елдері азаматтарының АҚШ-қа кіруіне тыйым салу сылтау ғана, Трамп шын мәнінде мұсылмандарды нысанаға алды. Соның салдарынан бір дінді ұстанушыларға жиіркеніш туындап, қоғамда қақтығыстар туындайды. Шындық мынада: Трамп АҚШ-қа кіруге тыйым салған 7 ислам елінің азаматтары осы елдегі ешбір лаңкестік әрекетке қатыспаған, тіпті 2001 жылғы 11 қыркүйек оқиғасын орындаушылар да осы 7 елден шықпаған.
АҚШ-ның ақпарат құралдарының мәліметі бойынша, бұл елдің Аппеляциялық сотының үкімімен Иран, Сирия, Судан, Ливия, Йемен, Ирак пен Сомали елдерінің азаматтары визамен АҚШ-қа кіре алады.
Бұған қарамастан, АҚШ-та атқарушы билік пен сот жүйесі арасындағы тартыс жалғасып жатыр. Трамп өзі қол қойған жарлықтан бас тартқысы келмейді. Өйткені АҚШ Президенті өзінің антимиграциялық жарлығына қарсы дауыс берген Аппеляциялық сотқа реакциясында бұл сотты саяси сипатта әрекет етті деп айыптап, оның үкімін теріске шығарды. Трамп, сонымен қатар, өзі шығарған жарлықтың орындалуы үшін заңды түрде талпыныстарын жалғастырып, бұл істі Жоғарғы сотқа апаратындығына уәде берді.
АҚШ-тың Конституциясы бойынша, осы елдің Жоғарғы соты Трамп жарлығының тағдырын анықтайтын соңғы инстанция болып табылады.
Енді АҚШ-тың атқарушы билігі мен сот жүйесі арасындағы құқықтық тартыста әділет пен бір дінді ұстанушыларға құрметтің тағдырының не болатынын күту керек.
