Байден: Ішкі терроризм мен экстремизм – АҚШ-тың келешектегі түйткілі
АҚШ Президенті Джо Байден өзінің инаугурациясында: «Ішкі терроризм мен экстремизм – АҚШ-тың келешектегі түйткілі. Мұны жеңуіміз керек»,-деді.
IRNA ақпарат агенттігінің хабарлауынша, Джо Байден сәрсенбі күні АҚШ-тың 46-шы Президенті ретіндегі алғашқы ресми сөзінде АҚШ халқының жұмыла түсуі қажеттігін айтып: «Бірлесе отырып, елді жайлаған экстремизм мен заңсыздықты жоюымыз керек»,-деді.
Ол Трамп жақтастарының Конгреске шабуыл жасағанына тоқталып: «Әлгі қатыгез топ халықтың ерік-жігерін мұқалтып, демократияға сызат түсіре аламыз деп ойлады. Алайда бұлай болмады, ешқашан болмайды да»,-деді.
Джо Байден АҚШ-тағы ақ нәсілділерді артық санау және ішкі терроризмге тоқталып: «Осындай мәселелермен күресеміз»,-деді.
Джо Байден өз үкіметінің коронавирустың таралуымен күреске қатысты бағдарламасына тоқталып: «Ақыр соңында біртұтас ел болып осы індетке төтеп беруіміз керек»,-деді.
