Ауғанстанның Хост қаласында жарылыс болды

Ауғанстанның шығысында орналасқан Хост қаласында болған бүгінгі жарылыстан 3 адам қаза тауып, 7 адам жараланды.

Кабулдың қауіпсіздік басқармасының баспасөз өкілі Халид Задран бүгін Хост облысының әкімшілігі баспасөз қызметінің мәліметіне сүйеніп: "Хост қаласындағы Ақ мешітке жақын жердегі бір қонақ үйде жарылыс болды. Соның салдарынан 3 адам қаза тауып, 7 адам жараланды",-деп хабарлады.

Халид Задран: "Қаза болғандар мен жараланғандар – Пәкістаннан келген босқындар мен Хосттың тұрғындары. Жараланғандар ауруханаға жатқызылды",-деді.

Задранның айтуынша, жарылыстың қалай болғаны әлі белгісіз, бірақ тергеу тобы оқиға орнында жұмыс істеп жатыр.