Рухани: Бейт ул-Мұқаддасты саяси ойындармен мұсылмандардан бөлу мүмкін емес

ИИР Президенті: "Барлық мұсылмандар әл-Ақса мешіті мен Бейт ул-Мұқаддасты қадірлейді. Бұл қасиетті жерді саяси ойындармен әлемдегі 1 млрд 500 млн мұсылманнан бөлу мүмкін емес",-деді.

Хасан Рухани сәрсенбі күнгі үкіметтің отырысында Палестина халқының қарсыласуына тоқталып: "Сионистік режим әрдайым басқыншылық жасап, бейкүнә жандарды өлтіруді көздеп келеді. Бұл режимнің әскерилері "Некбат" (Бақытсыздық) күні  Палестинаның жапа шеккен халқын қанға бөктіріп, алпысқа жуық адамды шәһид етіп, мыңдаған адамды жаралады",-деді.

ИИР Президенті  Батыс пен ислам әлеміндегі кейбір елдердің сионистердің қылмыстарына қарсы үнсіздік танытқанына өкініш білдіріп: "Палестина халқы өз жері үшін күресіп жатыр. Батыстың кейбір елдерінің сионистік режимнің қылмыстарына қатысты "заңды қорғаныс" тіркесін қолдануы өкініш тудырады",-деді.

Рухани ИИР-ның әрдайым Палестина халқының құқықтарын қорғап келе жатқанын айтып: "Иран үнемі басқыншылар мен зұлымдарға қарсы тұрып келеді. Түбінде жапа шеккендер мен палестиналықтар жеңеді",-деді.

Ол, сондай-ақ, АҚШ-тың "Ортақ қадам" жан-жақты бағдарламасынан шыққанына тоқталып: "Ядролық  мәселеде кейбіреулер қысым, санкция мен қоқан-лоққы жасап, тіпті соғыстың белгілерін көрсету арқылы Иран халқын тізе бүктіре аламыз деп ойлайды, алайда Иран халқының табанды қарсылығы бұл ойдың қате екенің айқын көрсетті",-деп баса айтты.