Әл-Абади Иранға лаңкестікпен күресте Иракты қолдағаны үшін алғыс айтты

Ирак Премьер-министрі Хейдар әл-Абади Иранға лаңкестікпен күресте Иракты қолдағаны үшін алғыс айтты.

IRNA ақпарат агенттігінің хабарлауы бойынша, Хейдар әл-Абади сәрсенбі күні Ирак пен Иранның жоғары лауазымды делегацияларының қатысуымен ИИР Вице-президенті Исхақ Джахангиримен кездескеннен кейін өткен баспасөз конференциясында Иранға ДАИШ лаңкестерін толық жеңгенге дейін Ирактың қасынан табылғаны үшін алғыс айтты.

Сонымен қатар, Ирак Премьер-министрі Иранның осы елді қайта қалпына келтіруге атсалысуын қолдайтынын айтып: "Иран бұл іске 2 млрд доллармен қатысады",-деді.

ИИР Вице-президенті де баспасөз конференциясында Ирак халқын ДАИШ лаңкестерін толық жеңуімен құттықтап: "Иран мен Ирактың тарихи және географиялық  ортақтастықтары екі елді өзара қарым-қатынасты нығайтуға ынталандырады",-деді.

Джахангири Иранның Иракпен барлық салада қарым-қатынасты нығайтуға, соның ішінде  газ тасымалдау, мұнайға қатысты әртүрлі келісімдерге қол қою және инвесторлар, кәсіпкерлер мен зияратшылардың істерін жеңілдету үшін банкаралық қатынасты нығайтуға мүдделі екенін айтты.