«Кім қозғалса, өлтірілсін»; Сионистік режимнің Газадағы ұйымдасқан қылмыстары
ParsToday - Газа соғысына қатысқан бірқатар израильдік солдаттар мен офицерлердің таңғаларлық мойындауларына сәйкес, олар Газа секторының барлық тұрғындарын лаңкес деп санап, Израиль армиясының нақты бұйрығымен оларды нысанаға алған.
«Үнсіздікті бұзу» ұйымының хабарлары мен сионистік сарбаздардың мойындауларына сәйкес, сионистік режим Газадағы тіршілікті толығымен жою үшін ұйымдасқан әскери жоспарды жүзеге асырды. ParsToday агенттігінің Tasnim ақпарат агенттігіне сілтеме жасап хабарлауынша, Израиль әскерлері мен офицерлері көптеген есептерде палестиналық бейбіт тұрғындарға қарсы қасақана және жүйелі қылмыстарын мойындап, тіпті бұл әрекеттерін мақтан тұтады.
«Үнсіздікті бұзу» ұйымының мәліметі бойынша, сионистік сарбаздарға буферлік аймақта (Газаның тереңдігі 800 метр мен 1,5 шақырым аралығында) көрген әрбір палестиналықты өлтіру бұйырылды. Израильдің жоғары лауазымды офицері олардың міндеті Газадағы барлық нәрсені және барша адамды жою екенін баса айтты. Осы аймаққа қарайтын ғимараттар ауыр бульдозерлермен дереу қиратылды және бұл әрекет сионистік әскерилер арасында бәсекелестікке айналды, әрбір қолбасшы Газадағы ең көп ғимараттарды қиратуды мақтан етіп, өз бақылауындағы аймақты «тазаланған» аймақ ретінде таныстырды. Осы хабарға қарағанда, Израиль әскері «Газада бейбіт тұрғындар жоқ, бәрі лаңкес» деп ақталып, жазықсыз адамдарды өлтіруді жалғастырды. Бір сарбаз тамақ үшін шөп жинап жүрген аш палестиналықтарды террорист деп айыптап, қалай өлтіргенін еске алады. Ол былай деп қосты: «Бейбіт тұрғындармен қарым-қатынас жасау ережелері болған жоқ; қозғалған кез келген адамды өлтіру керек еді».
Тағы бір сионистік сарбаз: «Біз өзіміздің операциялық аймақ үшін шекара сызығын сызып қойдық, оны кесіп өткен кез келген адам күдікті болып саналып, өлтірілуі керек еді; Сондықтан кейде палестиналықтар ол жерге қателесіп кіріп, өлім жазасына кесілді»,- деді.
Осыған байланысты 2023 жылдың соңынан бері сионистік әскерилер Газаны соғыстан кейін қалпына келтіруді мүмкін етпеу үшін бульдозер, миналар мен жарылғыш заттарды пайдаланып, мыңдаған ғимараттарды, ауылшаруашылық және өнеркәсіптік жерлерді қиратты. Израильдік бір резервші Газа секторындағы осы шабуылдардан кейінгі жағдайды «Хиросимаға» теңеп: «Жойқыншылықты елестету мүмкін емес және бұл қылмыстарды ақтауға болмайды»,-деді.
Бұл есеп Израиль режимінің шабуылдарының әскери мақсаттарға емес, Газадағы өмірді толығымен жою және бейбіт тұрғындарды жаппай өлтіру мақсатында жасалғанын көрсетеді.
