Иран Сыртқы істер министрінің Латын Америкасына сапары басталды
Иран Сыртқы істер министрі Мұхаммад Джавад Зариф жексенбі күні таңертең саяси-экономикалық делегацияны бастап, алғаш рет Латын Америкасына аттанды.
Мұхаммад Джавад Зарифтің Латын Америкасындағы 6 елді аралаудағы мақсаты «Ортақ қадам» жан-жақты бағдарламасынан кейін осы елдермен саяси-экономикалық байланыстарды кеңейту деп жарияланды.
Латын Америкасы елдерімен қарым-қатынасты дамыту – ИИР саясаттарының бірі. Иран мен Латын Америкасы елдерін бір-біріне жақындастырған себептердің бірі – олардың үстемшілдерге қарсы революцияшыл тарихқа ие болуы. Латын Америкасы – көптеген халықтық қозғалыстар мен көтерілістердің ошағы.
Иран мен Латын Америкасы елдерінің үстемшілдерге қарсы революцияшыл тарихымен қоса, осы қатынастарды дамытудың экономикалық түрткілері де бар. Бүгінде географиялық алшақтыққа қарамастан, Иран бір кездері АҚШ-тың демалатын жері саналған Латын Америкасында халықаралық сахнада қарқынды дамыпе келе жатқан өркениетке ие ірі бейбіт ел деп танылған.
Алайда қазіргі жағдайдағы Зарифтің Латын Америкасына сапарының маңыздылығын халықаралық деңгейдегі өзгерістер мен үлкен мәселелерде ынтымақтастық жасап, жақындасу қажеттігі аясында назарға алу қажет. Иран мен Латын Америкасы елдерінің БҰҰ, Қосылмау қозғалысы мен 77 тобы мен басқа да бірқатар маңызды халықаралық ұйымдарға мүшелігі саяси және халықаралық салаларда өзара әріптестік үшін тиімді жағдай жасады. Қосылмау қозғалысындағы төрағалықтың Ираннан Венесуэлаға берілуі, терроризм мен экстремизм сияқты түйткілдер мен мәселелерде интеграцияны нығайту, қыркүйек айында өтетін саммитке дейін Венесуэламен ОПЕК-тегі мұнай саясаты жөнінде үйлесімділік жұмыстарын жасау – осының барлығы аталмыш сапар барысында ирандық дипломаттар тарапынан талқыланатын болады.
Мұнымен қоса, Латын Америкасы елдерінің қайраткерлерімен кездесіп, келіссөз өткізу және жеке сектор өкілдеріне экономикалық семинарлар өткізу осы сапардың келесі бағдарламаларының қатарын құрайды.
Латын Америкасы 30 ел мен 600 млн-нан астам адам халқымен үлкен әлеуеттерге ие, сондай-ақ саяси-экономикалық тұрғыдан халықаралық сахна мен БҰҰ-да шешім қабылдау үдерісінде маңызды да ықпалды рөл атқарады.
ИИР көздейтін үлкен мақсаттардың бірі аймақ және әлем деңгейіндегі қауіпсіздік мәселелеріне қатысты сыртқы саясатта қоқан-лоққыны жойып, интеграцияны нығайту болып табылады. Осы тұрғыдан Иранның Латын Америкасы елдерімен әріптестігі саяси салада болсын, экономика және мәдениет саласында болсын екі тарапқа да жақсы мүмкіндіктер тудырды деп айтуға болады. Әсіресе бүгінде «Ортақ қадам» жан-жақты бағдарламасы орындалып, санкциялардың жойылуы жаңа қолайлы кеңістік тудырды. Сондықтан осы сапарда саяси-экономикалық және мәдени салаларда жасалатын қадамдар ортақ мүдделерді қамтамасыз етіп, көбірек әріптестік үшін мықты негіз қалыптастырады. Ал бұл өз кезегінде Иран мен Латын Америкасының ұзақ мерзімді ортақ мақсаттарын ілгерілетуге көмектеседі.
