Трамп FBI-дың директорын отставкаға жіберді

АҚШ Президенті Дональд Трамп сейсенбі күні Федералдық тергеу бюросының (FBI) директоры Джеймс Комиді отставкаға жіберді.

ИРНА-ның «АВС NEWS» арнасына сілтеме жасап хабарлауы бойынша, Ақ үйдің мәлімдемесінде: «АҚШ Президентінің елінің Федералдық тергеу бюросының (FBI) директоры Джеймс Комиді отставкаға  жіберуі АҚШ Бас прокуроры мен оның орынбасарының ұсынысымен жасалды»,- деп айтылған.

АҚШ Бас прокуроры Джефф Сешнс бұдан бұрын Трампқа хат жазып, Джеймс Комиді отставкаға жіберуді сұраған болатын. Ақ үйдің мәлімдемесі бойынша, Джеймс Комидің орнына келетін адам әлі анықталған жоқ.

Джеймс Коми осыдан біраз уақыт бұрын Трамптың ызасына себеп болған әрекетінде Трамп пен Ресейге жақын адамдардың арасындағы қарым-қатынас ықтималын зерттеу жұмыстарының жүріп жатқанын  растаған болатын.