Әзірбайжан Республикасы Арменияға айып тақты
Әзірбайжан Республикасының Қорғаныс министрі Арменияны шетелдік жалдамалыларды қызметке алды деп айыптады.
Azar-News ақпарат агенттігінің сенбі күнгі хабарлауы бойынша, Әзірбайжан Республикасының Қорғаныс министрі Закир Хасанов: «Армения шетелдік жалдамалыларды қызметке алып, ұйымдасқан лаңкестік топтармен әріптесе отырып, оларды Қарабақ аймағына орналастырды »,-деді.
Әзірбайжан Республикасының Қорғаныс министрі Арменияны лаңкестермен тікелей әріптестік жасап отыр деп айыптап: «Бұл әріптестік Ереванның саясатына айналды»,-деп мәлімдеді.
Закир Хасанов халықаралық ұйымдардың Арменияның лаңкестік топтармен әріптестігін тексеруін талап етіп: «Ереванның басқыншы саясаты салдарынан Қарабақ аймағы 20 жылдан астам уақыт бойы осы елдің қол астында қалып отыр, соның салдарынан Әзірбайжан Республикасының 1 млн азаматы босқындыққа ұшырады»,-деді.
Әзірбайжан Республикасы мен Армения арасында Қарабақ аймағына қатысты атысты тоқтату келісімі жасалғанына қарамастан, тараптар бұрынғыдай бір-бірінің позицияларын нысанаға алуда.
