Америкалық коалиция Сирияның әл-Хасаке қаласында 30 адамды өлтірді
ДАИШ-ке қарсы халықаралық коалицияның Сирияның солтүстік-шығысындағы әл-Хасаке облысына жасаған шабуылы салдарынан әскери емес қарапайым 30 адам қаза болды.
"Спутник" ақпарат агенттігінің мәліметі бойынша, майдандық дереккөздерінің бірі бейсенбі күні ДАИШ-ке қарсы АҚШ басқарған халықаралық коалицияның әскери ұшақтарының әл-Хасаке облысының әл-Қаср аймағына жасаған шабуылының салдарынан 30 сириялық азматтың қаза болғанын жариялады.
Осы мәлімет бойынша, тағы басқа 20 адам жарақат алып, әл-Хасаке облысының әл-Қаср аймағының тұрғын үйлеріне көптеген шығын келтірілді.
Бұл шабуылдан кейін Сирияның Сыртқы істер министрлігі БҰҰ-ның Бас хатшысы мен Қауіпсіздік кеңесінің кезеңдік басшысына хат жолдап, АҚШ басқарған халықаралық коалицияның Сирия халқына қарсы әскери қылмыстарын тоқтату үшін шара қолдануды сұрады.