АҚШ Сирияға С-300 зымырандық жүйесінің тапсырылуына алаңдаушылық білдірді
АҚШ Мемлекеттік департаментінің баспасөз хатшысы Хизер Нойерт сейсенбі күні кешке Ресейдің Сирияға С-300 зымырандық қорғаныс жүйесін тапсыруына алаңдаушылық білдіріп: «Оның Сирияда орнатылуы бұл елдің жағдайының нашарлауына соқтырады» деген уәж айтты.
Ресейдің Қорғаныс министрі Сергей Шойгу сейсенбі күні елінің Ұлттық қауіпсіздік кеңесінің отырысында С-300 жүйесінің Сирияға тапсырылғанын хабарлады. Шойгу Ресей Президенті Владимир Путиннің басқаруымен өткен отырыста зымырандық қорғаныс жүйесімен бірге ресейлік әскерилердің қауіпсіздігін арттыратын арнайы құралдардың да Сирия үкіметіне тапсырылғанын айтты.
Ресей Қорғаныс министрі Мәскеудің сириялық мамандарды С-300 жүйесін пайдалануды үйретуді бастағанын, бұл іске үш ай уақыттың қажет екенін мәлімдеді.
