Байден үкіметі Сауд Арабиясына қару-жарақ сатуға келісті
АҚШ Мемлекеттік департаменті Сауд Арабиясына 650 млн долларлық әуеден әуеге атылатын зымырандар мен оларға қатысты құрал-жабдықтарды сатуға келісті.
Вашингтон: «Бұл зымырандарды Сауд Арабиясына сату қатерге ұшыраған осы ел мен америкалық әскерилерді трансшекаралық ұшқышсыз ұшақтардан қорғауға көмектеседі»,-деп уәж айтты.
АҚШ-тың қорғаныс және қауіпсіздік саласындағы ынтымақтастық агенттігі де бейсенбі күні Конгреске хат жазып, бұл қару-жарақтарды сату АҚШ-тың сыртқы саясаты мен ұлттық қауіпсіздігін нығайтатынын жеткізді. Бұл хатта Сауд Арабиясы Батыс Азияда саяси-экономикалық өзгерістер үшін маңызды күш саналатын «дос ел» деп аталған.
АҚШ-тың жаңа қару-жарақтарын Сауд Арабиясына сату осы ел Президенті Джо Байденнің Йемен соғысын тоқтату және саудиялықтарға басқыншылық қару-жарақтарын беруді доғару туралы берген уәдесіне қайшы келеді.
Саудиялық қырғи ұшақтар америкалық қару-жарақтарды Йемендегі азаматтық нысандарға қарсы пайдаланады. Адам құқығын қорғаушылар мұны қатты сынап, алаңдаушылық білдіруде. Байден үкіметі осы мәмілені түсіндіруге талпынысында мұны тек Сауд Арабиясының зымырандар қорын толықтыруға көмектесу деп атап: «Бұл зымырандар жер бетіндегі нысандармен қақтығыста қолданылмайды»,-деп уәж айтты.
Байден үкіметінің Вашингтон мен Эр-Рияд қарым-қатынасын қайта қарастырады және Сауд режиміне қаталырақ қарайды деген бастапқы уәждеріне қарамастан, АҚШ-тың Батыс Азия аймағындағы ұзақ мерзімді геосаяси мүдделері Вашингтонды біртіндеп Эр-Риядқа қатысты ұстанымын өзгертуге мәжбүрледі.
Джо Байден 2021 жылы қаңтарда АҚШ-та билік басына келіп, оның үкіметі, соның ішінде мемлекеттік хатшы Энтони Блинкеннің Вашингтон мен Эр-Рияд қарым-қатынасын қайта қарау туралы кейбір ұстанымдары жарияланған соң осы салада түбегейлі өзгерістер болады деп күтілді. Бірақ бұл уәждерге қарамастан қазір АҚШ-тың Парсы шығанағы мен Батыс Азиядағы басты одақтастарының бірі Сауд Арабиясына қатысты жалпы саясаты бұрынғыдай оны жан-жақты қолдап, қорғауға бағытталғаны айқын байқалады. Сондықтан екі ел арасында әскери ынтымақтастық жалғасып жатыр.
