Әғраф сүресі, 239-ші бөлім, 124-127 аяттар

"Әғраф" сүресінің 124-125 аяттары:

""Әрине қол-аяқтарыңды шадырлата кестіремін, сонсоң түгелдей астырамын". (124) (Сиқыршылар): "Сөзсіз, Раббымызға айналамыз",-деді. (125)"

Өткен бағдарламада баяндағанымыздай Мысыр сиқыршылары хазірет Мұсаның (ғ) мұғжизасын көрген сәтте, оның істегені сиқыр еместігін білді. Сондықтан оған сеніп, оның А...-ның елшісі екенін мойындады. Алайда осындай масқарашылыққа шыдай алмаған Перғауын оларға: "Сендер Мұсамен бірігіп маған қарсы астыртын әрекет жасап отырсыңдар",-деп  жала жапты. Бұл аяттың айтуынша: "Жала жабумен қоса, Перғауын оларды қатаң қорқытып: "Сендерді тым ауыр жазалаймын. Қол-аяқтарыңды шадырлата кестіремін, бірақ табиғи түрде емес, оң қолдарың мен сол аяқтарыңды, немесе керісінше сол қолдарың мен оң аяқтарыңды кестіремін. Сонан соң өзгелерге ғибрат болсын деп сендерді сол күйлеріңде дарға астырамын",-деді". Бірақ ақиқатты түсініп, Мұсаға (ғ) саналы түрде иман келтірген сиқыршылар бұл қоқан-лоққылардан қорықпады. Перғауынға мән бермей: "Егер осылай істеп, мына бізді дарға ассаң, біз А...-ның жолында өліп, оған оралатын боламыз. Сен бізді шәһид болудан қорқытасың ба? Шәһид болу – мүмінге бақыт болып саналады,-деді". Осы аяттардан үйренетініміз:

Біріншіден, залым патшалардың қисыны - қоқан-лоққы, азаптау және өлтіру болып табылады. Олар А...-ның жолындағы адамдар шәһид болуды қуана қарсы алатынын білмейді.

Екіншіден, адам бұзылған биліктер мен орталарға бағынатындай емес. Иман және ерік-жігермен олардың барлығына қарсы тұруға болады.

Үшіншіден, иманымызға да мақтанбайық,  кәпірлердің иман келтіруінен де күдер үзбейік. Кәпір сиқыршылар бір сәтте жолын өзгертіп, баянды мүміндерге айналған.

"Әғраф" сүресінің 126-шы аяты:

""Сен бізден Раббымыздың аяттары келгенде иман келтірді деп қана өш аласың. Раббымыз! Бізге сабыр бер әрі бізді мұсылман болған күйде өлтір!" (126)"

Перғауын хазірет Мұсадан (ғ) көрген жеңілісінің есесін қайтару үшін оған және сиқыршыларға "билікті иемденуге астыртын әрекет жасап отыр" деген жала жапты. Сиқыршылар бұл аятта оған былай деп жауап береді: "Перғауын, бізде мұндай ниет болмағанын өзің білесің. Егер бүгін бізді өлтіру мен азаптауды ойлап, бізден кек алмақ болсаң, мұның себебі біздің Мұсаның Құдайына иман келтіргеніміз ғана". Сиқыршылар өз сөздерінің жалғасында қол жайып, дұға оқып: "Уа Раббым! Бізге осы жалалар мен қоқан-лоққыларға қарсы тұрып, дүниеден иманды күйде өтуіміз үшін сабыр мен төзімділік бергейсің",-деді. Бұл аяттан үйренетініміз:

Біріншіден, А...-ға иман келтіру жеткілікті емес, А... жолының дұшпандары алдында төзімділік те қажет.

Екіншіден, нағыз мүміндер һәм ұмтылыс пен талпыныс жасайды, һәм А...-ның алдында жалбарынады. Әрқайсысының бір өзі жеткіліксіз.

"Әғраф" сүресінің 127-ші аяты:

"Перғауын елінің бастықтары: "Мұсаны және елін, жер жүзінде бүліншілік қылсын және сені де, тәңірлеріңді де тастасын деп қоя бересің бе?",-деді. (Перғауын оларға): "Ұлдарын өлтіреміз де әйелдерін тірі қоямыз. Әрине біз олардың үстінде өктембіз",-деді. (127)"

Мұса (ғ) мен сиқыршылар оқиғасында Перғауын сиқыршылардың тағдырын белгілеп, оларды дарға асуға бұйрық береді. Алайда Мұсаның (ғ) жазасын белгілемеді. Мұсаның (ғ) болуын өздерінің мүдделеріне қайшы деп санаған Перғауын қасындағылардың көңілі толмай, Перғауынға: "Мұсаның да тағдырын шешіп бер. Өйткені бұл түйткілдер оның кесірінен басталды. Ол сенің тәңір екендігіңе және басқа құдайларға күмән тудырып, халықты басқа бір Құдайға шақырып отыр. Егер оны қоя берсең, Исраил қауымы бүлік шығарып, бұл елде тәртіпсіздіктер орнатады",-деді. Перғауын Мұсаның (ғ) халық арасында мәртебеге ие болғанын және оның өлімі өзінің билігі үшін ауыр салдар әкелетінн сезгендіктен, хазірет Мұсаға (ғ) байланысты шешім қабылдамай: "Біз Мұсаға ерушілерді тым ауыр азаптаймыз. Исраил қауымының ерлері мен жастарынан әркім бізге қарсы шықса, оны өлтіреміз. Қыздары мен әйелдерін сарайларымызға күң қыламыз. Өйткені біз оларға толық үстембіз және күшіміз олардың күшінен көбірек",-деді. Осы аяттан үйренетініміз:

Біріншіден, азғындықты бастаушылар пұтқа табынушылардың өздері. Олар хазірет Мұса (ғ) сияқты ізгі тұлғаны азғын деп атайды.

Екіншіден, перғауын сынды адамдардың саясаты жас ұрпақты құртып, әйелдер мен қыздарды күң қылу. Қазіргі таңда да батыс әлемі жастарды нашақорлық пен азғындыққа тартып, әйелдерді сән үшін жұрттың алдына шығаруда.