Әғраф сүресі, 237-ші бөлім, 109-116 аяттар

"Әғраф" сүресінің 109-110 аяттары:

"Перғауын елінің шонжарлары: "Бұл асқан шебер сиқыршы екен. (109) Бұл сендерді мекендеріңнен (Мысыр жерінен) қумақшы. Қандай ақыл-кеңес бересіңдер?",-деді. (110)"

Өткен бағдарламадан білгеніміздей, А... тағала хазірет Мұсаға (ғ) Перғауынға барып, оны А...-ның жолына шақырып, Исраил қауымын оның қол астынан құтқаруды тапсырады. Мұса (ғ) өз сөздерін дәлелдеу үшін оларды таң қалдырған мұғжизалар көрсетеді. Бұл аяттардан, Перғауынның маңайындағы шонжарлар ешкімнің хазірет Мұсаның (ғ) сөздері мен мұғжизасының ықпалына түспеуі үшін оның істерін "сиқырлық", ал өзін "шебер сиқыршы" деп атамақ болғанын оқимыз. Сол кезде сиқырлық кең таралғандықтан, халық сиқыршылардың ісі шындыққа жатпайды және ол айланың бір түрі екенін білетін. Перғауынның маңайындағылар Мұсаның (ғ) істерін сиқырға ұқсатумен қоса, оның мақсаты билік пен байлыққа қол жеткізу деп біліп: "Ол сендерді орындарыңнан түсіріп, Исраил қауымына билік жүргізу үшін патшалықты қолға алуды көздейді. Олай болатын болса, бұл елде біз бәрінен айрылып, осы жерден шығуымыз керек болады",-десті. Сондықтан олар бір-біріне осы жайлы ойланып, пікір айтуларын сұрайды. Бұл аяттардан үйренетініміз:

Біріншіден, пайғамбарлардың жаулары олардың айқын дәлелдері мен қисындарына қарсы айыптар тағып, қырсығып, жауласады.

Екіншіден, билік басындағылар ақиқат жолындағы тұлғаларды мақсаттарынан тайдыру үшін оларға "билікқұмар және байлыққұмар" деген жала жабады.

"Әғраф" сүресінің 111-112 аяттары:

"Олар: "Мұсамен оның ағасының ісін соза тұрып, қалаларға (сиқыршыларды жиюға) шапқыншы жібер. (111) Асқан сиқыршыларды саған жиып әкелсін",-деді. (112)"

Перғауын сарайындағы ақсүйектер мен шонжарлар кеңесе келе, Мұсаны (ғ) әзірше өлтірмеуді және оған қарсы сиқыршыларды қолдануды ұйғарады. Сондықтан Перғауынға: "Мұсаны жазалауға асықпай, барлық қалалардан сиқыршыларды жинауға бұйрық бер",-дейді. Бұл аяттардан үйренетініміз:

Біріншіден, залым биліктер ақиқатты жеңу үшін халықаралық жиналыстар, бас қосулар мен семинарлар ұйымдастырады.

Екіншіден, адасқан адамдар кейде білім, мамандық пен өнерді ақиқатпен күресуге пайдаланады.

"Әғраф" сүресінің 113-114 аяттары:

"Сиқыршылар Перғауынға келіп: "Егер жеңсең, бізге сыйлық берілетін шығар?",-деді. (113)Перғауын: "Әрине (беріледі), оның үстіне өзімнің жақын адамдарым боласыңдар",-деді. (114)"

Перғауынның шақыруымен Мысыр елінің жан-жағынан барлық сиқыршылар жиналып, Перғауын сарайына келеді. Бұл жерде не істеу керектігі туралы нұсқаулар алған соң, олар: "Бұл үлкен іс. Егер біз Мұсаны жеңетін болсақ, үлкен сыйлық алуымыз керек",-деді. Перғауын оларға материалдық сыйлықтармен қоса, оның қасында мәртебелі орынға ие болып, оның жақын адамдары қатарынан орын алатындарын уәде береді. Бірақ ол үшін Мұсаны жеңу керек. Осы аяттан үйренетініміз:

Біріншіден, сиқыршылар да өзге адамдар тәрізді өздерінің істеріне ақы сұрайды. Алайда пайғамбарлар халықты А...-ның жолына шақырғаны үшін ешқандай ақы тілемейді. Тарих бойындағы пайғамбарлардың ерекшеліктерінің бірі де осы.

Екіншіден, залым биліктер ақиқатты басып жаншу үшін қаржы жұмсайды. Олар өз мақсаттарына жету үшін өнер адамдары мен мамандарға көп уәде береді.

"Әғраф" сүресінің 115-116 аяттары:   

"Олар (сиқыршылар): "Ей, Мұса! (таяқты) алдымен сен лақтырасың ба, әлде біз лақтырамыз ба?",-деді. (115) "Сендер лақтырыңдар",-деді Мұса. Олар (таяқтарын, жіптерін) лақтырып, көз байлағыштығын істетті (лақтырғаны жыланға айналып өрмелеп), адамдарды қатты шошытты. Олар керемет сиқырлық көрсетті. (116)"

Сиқыршылар Мұсамен (ғ) сайысқа дайындалған соң, Перғауын халықты үлкен алаңға шақырады. Перғауын осы қызық қойылымда Мұсаны (ғ) жеңіп, оны алаңнан мәңгіге кетіремін деген пиғылмен, Мұса (ғ) мен сиқыршыларды олардың ортасына шақырды. Сиқыршылар Мұсаға (ғ): "Сен бастайсың ба, әлде біз бастайық па?",-деді. Олар өздерінің істеріне сенімді болғаны сонша, тіпті Мұсаны (ғ) міндетті түрде жеңетіндей "Біз бастасақ та, сен бастасаң да бәрібір" деп сөйледі. Бірақ хазірет А...-ның күшіне сенген Мұса (ғ) сенімді түрде: "Өз істеріңді көрсете беріңдер",-деді. Осылайша олар өздерінің шеберлігі мен сиқырлық әрекеттерін көрсетіп, көрермендерді таң қалдырды. Тіпті олардың жасанды жыландарынан халықтың зәресі ұшты. Осы аяттардан үйренетініміз:

Біріншіден, адамның сыртқы сезімдері алданып, шындықтарды өзгеше көреуі мүмкін. Сиқыршылар осы қателесуді пайдаланады. Мысалы, алыстан көзге су болып көрінетін сағым тәрізді.

Екіншіден, сиқырлық – қиялдағы және түсініксіз нәрсе емес. Ол адамның ішкі дүниесіне әсер етеді. Сол себепті Ислам дінінде харам болып саналады.