Әғраф сүресі, 236-ші бөлім, 103-108 аяттар

"Әғраф" сүресінің 103-ші аяты:

"Одан кейін Мұсаны (ғ) Перғауын және сыбайластарына мұғжизалармен жібердік. Сонда олар мұғжизаға қарсы келді. Ал енді бұзақылардың соңының қалай болғанын көр. (103)"

"Әғраф" сүресінің басындағы аяттар Һуд, Салих, Лұт және Шұғайыб (ғ) сынды бірнеше илаһи пайғамбардың әңгімесін баяндаған болатын. Бұл аят былай дейді: "Осы пайғамбарлардан кейін біз хазірет Мұсаны (ғ) пайғамбарлыққа таңдадық. Әуелінде оған Перғауын мен Исраил қауымының басшыларын дінге шақыруды тапсырдық. Бұл істе оған оның пайғамбарлығын дәлелдейтін мұғжизалар мен белгілер бердік. Бірақ Перғауын мен оның адамдары Мұсаның (ғ) сөздерін қабылдамай, оған қисынсыз мінез көрсетіп, оған және оның мұғжизаларына зұлымдық жасап, азғындығын қоймады". Хазірет Мұсаның (ғ) есімі Құранда 136 рет келтірілген. Құранның әртүрлі сүрелеріндегі аяттарда оның дүниеге келуі, балалық шағы, Мысырдан Мәдянға қашуы, сонан соң пайғамбарлыққа таңдалып, Перғауынмен күресуі, өз қауымын Перғауынның құлдығынан құтқаруы және оның Исраил қауымымен қарым-қатынасы баяндалған. Осы аяттардан үйренетініміз:

Біріншіден, пайғамбарлардың ең бірінші міндеті залым биліктермен күресу болған. Өйткені қоғамды түзету үшін негізгі тұлғаларға барып, суды бұлақтың көзінен алу керек.

Екіншіден, залым биліктердің тез кететін көріністері біздің көзімізді алдамасын. Өйткені бүгінгі жарқыраған нәрселер емес, істің нәтижесі маңызды.

"Әғраф" сүресінің 104-105 аяттары:

"Мұса (ғ): "Әй, Перғауын! Шынында мен бүкіл әлемнің Раббы тарапынан жіберілген бір елшімін",-деді. (104) "А...-ға ақиқатты ғана айтуға міндеттімін. Сендерге Раббыларыңнан ашық дәлел әкелдім. Енді Израил ұрпақтарын менімен бірге жібер",-деді. (105)"

Перғауын өзін құдай деп санап: "Мен сендердің ең ұлы раббыларың",-деді. Сол себепті хазірет Мұса (ғ) онымен алғашқы теке-тіресте: "Мен сендерге әлемнің жаратушысы тарапынан келдім. Мен оның сөзін ғана сөйлеймін, өзімнен ештеңе қоспаймын. Мына көріп тұрған мұғжизалар бұл сөзімнің дәлелі. Мұның барлығы менен емес, А...-ның тарапынан берілген нәрсе. Ей, Перғауын! Зұлымдықтан бас тарт. Маған еріп, өз еріктерімен жүруі үшін Исраил қауымына бостандық бер",-дейді. Осы аяттан үйренетініміз:

Біріншіден, пайғамбарлар ақиқат сөзінен басқа ешқандай талап қойған емес. Осы жолда олар ешкімнен, тіпті залым биліктерден қорықпаған.

Екіншіден, пайғамбарлардың ең алғашқы мақсаты – адамдарды залым биліктердің қолынан азат ету болған.

"Әғраф" сүресінің 106-107 аяттары:

"(Перғауын): "Егер сен бір мұғжиза келтірген болсаң, ал оны әкел. Егер сөзің шын болса",-деді. (106) Сонда (Мұса ғ) таяғын тастады. Ол дереу ашықша бір айдаһар болды. (107)"

Перғауындықтар алғашында: "Мұсаны сынайық. Мүмкін ғажайып іс келтіре алмай, өтірік айтқан болып шығып, өзінен-өзі рәсуа болар. Бірақ егер ол мұғжиза көрсетсе, онда оны сиқыршысың деп айыптаймыз",-деп, хазірет Мұсаға (ғ): "Егер рас айтатын болсаң, Бізге мұғжизаңды көрсет",-деді. Сонда Мұса (ғ) А... тағаланың әмірімен таяғын жерге тастаған шақта, ол бір үлкен айдаһарға айналды. Мұсаның (ғ) бұл таяғы одан бұрын да, Перғауынның алдында шошып кетпеуі үшін оның көзінше бір кішкентай жылан кейпіне айналған болатын. Дәл осы таяқ сиқыршылар Мұсаны (ғ) ұятқа қалдырмақ болып жиналған күні де, үлкен айдаһарға айналып, олардың барлық жасанды жыландарын жұтып алып, қайтадан таяққа айналады. Хазірет Мұсаның (ғ) бұл таяғынан басқа мұғжизалар да көрінген еді. Мысалы, құрғақшылық жылында осы таяқты тасқа ұрғанда, одан он екі бұлақ аққан болатын. Сондай-ақ Ніл өзенінен өтетін кезде, осы таяқпен суға ұрғанда, өзен суы қақ жарылып, Мұса (ғ) мен оның серіктері оның ортасынан өтіп шығады. Бұл аяттан үйренетініміз:

Біріншіден, мұғжиза – пайғамбарлықтың шындығының дәлелі. Сондықтан Перғауын тәрізді адамдар оны қабылдамаса да, пайғамбарлар мұғжиза көрестуге тиісті.

Екіншіден, пайғамбарлардың мұғжизалары өз заманындағы ілімге сәйкес болған. Сиқырлық кең таралып, маңызды болып есептелген заманда, хазірет Мұсаның (ғ) мұғжизасы сиқырлыққа ұқсайтын, бірақ ол шындық еді.

"Әғраф" сүресінің 108-ші аяты:   

"Тағы қолын шығарды. Сонда ол қараушыларға аппақ көрінді. (108)"

Хазірет Мұсаның (ғ) Перғауын сарайында көрсеткен тағы бір мұғжизасы – жарқыраған ақ қолды көрсету болды. Ол қолын қойнына салып, қайта алып шыққан кезде күн секілді жарқырайтын. Мұны көрген адамдар таң қалатын. Иә, пайғамбарлар уағыз айтып, ескерту жасаумен қатар, таяқтың айдаһарға айналуы тәрізді қорқынышты мұғжизалар көрсетумен бірге, оларда үміт тудырып, А...-ның рақымдылығына сендіруге тырысқан. Осы аяттан үйренетініміз:

Біріншіден, дінді уағыздаушы дұрыс сөзі және қисынымен қоса, қажетті кезде пайдалану үшін күш пен рақымдылық құралымен жабдықталуы тиіс. Осылайша ол кейде А...-ның қаһарын, ал кейде А...-ның мейірімін көрсетуі тиіс.