Әғраф сүресі, 233-ші бөлім, 90-93 аяттар

«Әғраф» сүресінің 90-91 аяттары:

«Елінің ішінен қарсы болған бастықтары: «Егер Шұғайыпқа ілессеңдер, сол уақытта анық зиян көрушілерден боласыңдар»,-деді. (90) Сонда оларды бір сілкініс қолға алып жұрттарында етпеттенген бойларында қалды. (91)»

Өткен бағдарламада айтқанымыздай, Мәдян тұрғындары хазірет Шұғайыбқа (ғ) қарсы шығып, өздерінің әкім-билеріне еруге табандылық танытады. Олар оның құдайға құлшылық етуге шақыруын қабылдамай, оны және оның серіктерін қуып шығуға бел буып, осы илаһи пайғамбардың уағыздары мен насихаттарын ерегісе отырып жоққа шығарады. Бұл аяттар былай дейді: «Күпірлік жолына түскен Мәдян үлкендері халықты үнемі Шұғайыбтың (ғ) сөздеріне құлақ аспауға азғырып, «оған ерсеңдер зиян көресіңдер» дейді». Әрине олардың айтып отырғаны қаржылай және дүниелік зиян. Неге десеңіз Шұғайыбтың (ғ) халыққа жасаған негізгі ескертуі – кемітіп сатпау және өлшегенде затты азайтпау еді. Көзі тар дүниеқұмарлар кемітіп сату пайдаға кенелтеді деп санайты. Алайда халыққа А...-ның дәлелдері келген соң, олар ақиқатты түсінсе де оған қасарысып, А...-ның елшісін көріп, оның айқын қисынын ести тұра, оны өтірікке шығарып, оған қастандық жасауға ұмтылғандықтан оларға А...-ның азабы түседі. Түн ортасында кенеттен жер сілкініп, олардың қашып құтылуына мұрсат қалдырмайды. Ал қаша жөнелгендер тізелерінен жығылып, олардың үстіне үйлер құлады. Осы аяттардан үйренетініміз:

Біріншіден, пайғамбарларға қарсыларды әдетте қоғамдағы бейғам ақсүйектер мен байлар құрайтын.

Екіншіден, А...-ның ерекше сыйлары әулиелерге түнде берілетін тәрізді, Оның азабы көбінесе түн мезгілінде түседі.

 «Әғраф» сүресінің 92-ші аяты:    

«Шұғайыпты (ғ) жасынға шығарғандар, тіпті жұрттарында болмағандай болды. Сондай-ақ Шұғайыпты (ғ) жасынға шығарғандар зиян тартты. (92)»

Бұл аят илаһи азаптың күштілігін былай деп баяндайды: «Мәдян тұрғындары өз үйлерінің үйінділерінің астында көмілгені сонша, әркім ол жерге кіргенде, онда көп жылдар бойы ешкім тұрмағандай көрінеді». Құран Кәрім: «Кәпірлер, кемітіп сатудан бас тартсақ зиян көреміз деп ойлады. Бірақ бүгін, А...-ның аяттары мен нұсқауларын жасынға шығару өкінішке ұласқанын көрсетті. Дүниеде жан мен мал-мүліктен айрылу және ақыретте зиян шегіп тозаққа түсу өкініші»,-деп жалғастырады. Осы аяттан үйренетініміз:

Біріншіден, кәпірлердің қайғылы салдарынан ғибрат алайық, ақиқатпен жауласпайық.

Екіншіден, А...-ға тәуекел етіп, жалғанды ұстанушылардың айла-шарғылары нәтижесіз қалатынын білейік. Хазірет Шұғайыбты (ғ) қуып шығармақ болғандар, өз үйлерінде жойылды.

«Әғраф» сүресінің 93-ші аяты:

«Сонда ол, олардан бет бұрып: «Әй, елім! Расында мен сендерге Раббымның нұсқауларын жалғастырдым әрі сендерге үгіт еттім. Ал енді қарсы болған бір елге қайтып қайғырамын?»,-деді.(93)»

Хазірет Шұғайыб (ғ) және көзі жойылған Мәдян тұрғындары оқиғасының соңында осы аят осы илаһи пайғамбардың күпірлікке салынып, қасарысқан өз қауымынан бет бұрғанын баяндайды. А...-ның елшісі: «Ей, қауымым! Мен сендерге Раббым түсіргенді жеткізбедім бе? Сендерге уағыз-насихат айтпадым ба? Сендерге жанашыр болған менің сөзіме құлақ асудың орнына, сендерді өзінің құлына айналдырған кісілердің соңына ердіңдер. Сендерді тек өз мүддесіне қарай пайдаланған кісілерге иландыңдар. Ей, қауымым! Маған сендер үшін тапсырылған жолдауды жеткіздім. Қабылдап, мойындамаған өздерің. Ендеше сендердің тағдырларыңа несіне өкініп, ренжимін?»,-деп олардың өлгендерімен сөйлескен болып, оларға өкінішін білдіреді. Осы аяттан үйренетініміз:

Біріншіден, діни уағыздар басшылық пен жетекшілік тұрғысынан емес, жанашырлық пен қайырымдылық және ағайындық сөздер негізінде болуы тиіс.

Екіншіден, біз өз міндеттерімізді орындауымыз керек. Нәтиже бере ме, жоқ па? Оған алаңдамайық.

Үшіншіден, уағыз айтып, кешірудің де шегі бар. Халық әбден қабылдамайтын болған соң, олардан безу керек.

Төртіншіден, А...-ның қаһары барлық дәлелдер көрсетілген соң келеді. Халыққа ақиқат айқындалмайынша, азап берілмейді.