Әғраф сүресі, 230-шы бөлім, 77-82 аяттар:

"Әғраф" сүресінің 77-78 аяттары:

"Сондай олар інгенді өлтіріп, Раббыларының әмірінен шықты да: "Әй, Салих! Егер сен елшілерден болсаң, бізге бопсалағаныңды келтір",-деді. (77) Сонда оларды бір сілкініс қолға алды да үйлерінде етпеттеген бойларында қалды. (78)"

Хазірет Салихтың (ғ) Самуд қауымына әкелген мұғжизасы – таудың қойнауынан шыққан аруана болды. Ол тым көп су ішіп, мол сүт беретін. А... тағала оған тиіспеуді бұйырған еді. Бірақ халықтың хазірет Салихқа (ғ) иман келтіруінен өздерін қауіпте сезінген шонжарлар осы мұғжизаны жойып, хазірет Салихтың (ғ) халыққа ұсынатын нәрсесі болмау үшін, аруананы өлтіруге адам жалдайды. Осылайша олар аруананы ерекше қатыгездікпен өлтіріп, А...-ның елшісінен арсыздықпен: "Егер рас айтсаң, уәде еткен азабыңды әкел",-деп сұрайды. Аруананы өлтіруге халық қатыспағанымен және оны белгілі бір адам өлтіргенімен, олар осы қылмысқа үнсіздік танытқандықтан, олардың барлығы азапқа душар болады. Бұл аяттардан үйренетініміз:

Біріншіден, өркөкіректік пен тәкәппарлық – А...-ның нұсқаулары алдында бағынбаушылық пен арсыздыққа жол ашады.

Екіншіден, күнәға қатысты үнсіз отыру мен оған риза болу күнәға серік болумен тең және оның жазасы бар.

Үшіншіден, жерсілкіністер мен табиғи апаттар біздің күнәларымыздың салдары болуы мүмкін. Сондықтан сақ болайық.

"Әғраф" сүресінің 79-шы аяты:

"Сонда Салих олардан жүз бұрып: "Әй, елім! Расында мен сендерге Раббымның бұйрығын жалғастырдым. Бірақ сендер үгіттеушілерді жақсы көрмедіңдер",-деді. (79)"

Хазірет Салихтың (ғ) бұл сөздері азап түспес бұрын дәлелдерді тәмәмдау үшін де, осы қырсық қауымның көзі жойылған соң,  қоштасу ретінде айтылған сөз де болуы мүмкін. Ол хазірет былай дейді: "Мен өз міндетімді орындап, насихатым мен жанашырлығымды аямадым. Бірақ сендер жағымсыз қылықтарыңмен уағыздар мен жанашырлық сөздерге құлақ аспайтындарыңды көрсеттіңдер". Осы аяттан үйренетініміз:

Біріншіден, халықты А...-ның жолына шақырудағы пайғамбарлардың әдісі – Раббының жолдауын тек құр қаулы мен бұйрық түрінде емес, қайта әрдайым жанашырлық және ізгі ниетпен жеткізу болып табылады.

Екіншіден, насихатты қабылдай білейік және қоғамдағы насихатшыларды құрметтейік. Өйткені жанашырлардың сөзіне көңіл аудармау илаһи ашуға себеп болуы мүмкін.

"Әғраф" сүресінің 80-81 аяттары:

"Лұт (ғ) сол уақытта еліне: "Сендерден бұрын әлемнен ешкімнің істемеген арсыздығын істейсіңдер ме?",-деді. (80) "Сендер әйелдерді қойып еркектерге қызығып келесіңдер ме? Әрине сендер шектен шыққан елсіңдер. (81)"

Хазірет Салих (ғ) пен Самуд қауымының оқиғасынан кейін, осы аят хазірет Лұт (ғ) пен оның халқы жайлы әңгімелейді. Осы қауымның ішінде арсыздық пен азғындықтың жайылғаны сонша, тіпті олар үйленудің орнына біржынысты қатынастарға әуестенген еді. Олар осы сұмдық қылықтарын әдеттегі іс деп санады.

Хазірет Лұт (ғ) хазірет Ибраһим (ғ) заманында өмір сүрді және осы пайғамбар тарапынан әлгі азғындыққа салынған қауымды дұрыс жолға салуға жіберілген еді. Бұл қауымда тыйым салынған жыныстық қатынастар әдеттегі қатынастар болып есептелді. Осы сұмдық іс олардың арасында кең таралғаны сонша, Құран "оларға дейінгі ешбір қауым мұндай азғындыққа салынбаған еді" деп сипаттайды. Әрине қазіргі заманда да осы сұмдық күнәнің таралғаны сонша, тіпті кейбір Батыс елдерінде ол заңды және рұқсат етілген болып есептеледі. "А... тағала өздерін әйелдер ұқсап басқа еркектерді қоздыру үшін көрсететін еркектерді лағынет еткен. Ислам бойынша мұндай сұмдыққа барған адамның екеуінің де жазасы - өлім",-дейді Ислам пайғамбары (с). Осы аяттардан үйренетініміз:

Біріншіден, жыныстық қатынастың табиғи жолынан шығу болып саналатын "біржыныстық" қатынас – әйелдер мен еркектердің құқығын бұзудың бір түрі мен астамшылдық.

Екіншіден, қоғамда жаман істің әдетке айналуы аса қауіпті. Өйткені азғындықтың жайылуы түрлі апаттарға себеп болады.

"Әғраф" сүресінің 82-ші аяты:    

"Елінің жауабы: "Оларды кенттеріңнен шығарыңдар. Өйткені олар өте тазасынған адамдар",-деу ғана болды. (82)"

Хазірет Лұттың (ғ) сөздері анық әрі қисынды болғанымен, күнәһар қауым ерекше арсыздықпен оны және оған ерушілерді қуып шықпақ болады. Олар өздерінің сұмдық қылықтарына жауап беру, дәлел келтіру немесе кешірім сұраудың орнына ұялмастан: "Сендер өздеріңді таза деп санасаңдар, мына жерден шығыңдар, бұл жерде біз қаламыз!",-деді. Осы аяттан үйренетініміз:

Біріншіден, күнә мен азғындықтың ешқандай қисыны мен дәлелі жоқ. Сондықтан күнәһарларда таза адамдарды қуудан басқа жауабы жоқ.

Екіншіден, егер қоғамда азғындық жайылып кетсе, өзіміздің сол қоғамнан кетіп, барлық істер азып кеткендердің қолына түсуінен басқа шара қалмайды.