Әғраф сүресі, 229-шы бөлім, 72-76 аяттар

"Әғраф" сүресінің 72-ші аяты:

"Біз Һудты және онымен бірге болғандарды рақыметімізбен құтқардық. Аяттарымызды өтірік деп иман айтпағандардың тұқымын тұздай құрттық. (72)"

Өткен бағдарламада Ғад қауымы хазірет Һудтың (ғ) шақыруына барынша қарсылық білдіріп, оны қабылдамай тастағанын және асқан арсыздықпен: "Егер шын айтатын болсаң, қиямет жөнінде уәде еткеніңді осы дүниеде көрсет",-дейді. Бұл аят былай дейді: "А... тағала да осы қырсық қауымды азабына душар қылып, оларға жеті тәулік бойы қатты дауыл соқтырып, оларды қиратып, жойды. Оларды құрма ағашының діңгегі тәрізді жерге қадады. Бірақ хазірет Һуд (ғ) пен оның қасындағы иман келтіргендер бұл азаптан аман қалып, А...-ның жарылқауына бөленді". Осы аяттан үйренетініміз:

Біріншіден, А... тағала – әділ. Ол құрғақ пен дымқылды бірге өрттемейді. Қаһар мен азап түскен кезде нағыз мүміндерді құтқарып алады.

Екіншіден, тарихтан ғибрат алайық, А... мен оның елшілеріне қарсы шықпайық, әйтпесе жойыламыз.

"Әғраф" сүресінің 73-ші аяты:  

"Самуд еліне де өз ұрқынан Салихты (пайғамбарлықпен) жібердік. Ол: "Уа, қауымым! А...-ға құлшылық етіңдер! Сендердің оден өзге құдайларың жоқ. Сендерге Раббыларыңнан айқын мұғжиза келді. А...-ның мына аруанасы сендерге мұғжиза болмақ. Оны А...-ның жеріне қоя беріңдер, жайылсын, оған тиіспеңдер, сұмдық азап түптеріңе жетеді",-деді. (73)"

Ғад қауымының оқиғасын баяндаған соң, бұл аят Самуд қауымының оқиғасына тоқталып: "А... тағала хазірет Салихты Самуд қауымының арасынан пайғамбарлыққа таңдады. Сондықтан ол да, өзге пайғамбарлар тәрізді халықты бір А...-ға құлшылық етуге және пұтқа табынудан аулақ жүруге шақырды. Халық одан мұғжиза сұрағанда, А... тағаланың қалауымен таудың қойнауынан бір ұрғашы түйе шығады. Осы буаз түйе бота табады. Бұл арадағы ғажайып нәрсе, бұл түйенің жалғыз өзі осы қауымның сүтке қажетін қамтамасыз етуі еді. Хазірет Салих халықтан түйені бағып, оған тиіспеуді сұрайды. Өйткені оған зиян тигізетін адам, А...-ның қаһарына ұшырайды",-дейді. Осы аяттан үйренетініміз:

Біріншіден, пайғамбарлардың халықпен байланысы – бауырластық әрі тең байланыс. Пайғамбарлар халыққа жоғарыдан қарап сөйлемеген, қайта бауырластық тұрғыдан оларды А...-ға қарай шақыратын.

Екіншіден, А...-ға қатысты нәрселер тіпті бір түйе болса да – қасиетті. Сондықтан оған құрметсіздік жасалса, жазаға себеп болады. Ендеше діни қасиеттерді құрметтей білейік.

"Әғраф" сүресінің 74-ші аяты: 

"Өз уақытында А... сендерді Ғадтардан кейін олардың орынбасары етіп, (Һижр) жеріне орналастырғанын естеріңе алыңдар. Ол жердің жазығына сарайлар салып, тауларын үңгіп үй жасадыңдар. А...-ның нығметтерін еске алыңдар, жер жүзінде бұзықтық істемеңдер. (74)"

Хазірет Салих (ғ) Самуд қауымына: "Сендерден бұрын өмір сүрген және ақиқатқа қырсығып, қарсы шыққандығы себепті жойылып кеткен Ғад қауымынан ғибрат алыңдар. Бүгінде солардың орнына келген сендер, олардың жолымен жүрмеңдер. А...-ның нығметтерінің қадірін біліңдер, жер бетінде бұзықтық істемеңдер. Сендерге жерде тұрып, тау мен далада осындай ғимараттар салу үшін күш-құдіретті А... тағала бергенін біліңдер",-деді. Осы аяттан үйренетініміз:

Біріншіден, бұрынғылардың тарихы – болашақтағылар жолының шырағы болып табылады. Ендеше үнемі тарихты оқып, еске алып отыру керек.

Екіншіден, тұрмыс жағдайы жақсы және молшылықта өмір сүретін адамдар азғындыққа салынып кетпес үшін А...-ны көбірек еске алулары тиіс.

"Әғраф" сүресінің 75-76 аяттары:

"Салихтың еліндегі астамсыған шонжарлар елінің ішіндегі иман келтіргендерді қорлап: "Сендер Салихты Раббы тарапынан келген анық елші деп білесіңдер ме?",-деді. Олар: "Біз оның пайғамбар екендігіне әрине сенеміз",-деді. (75) Әлгі өркөкірек шонжарлар: "Сендер сенгенге, біз әсте сенбейміз",-деді. (76)"

Хазірет Салихтың (ғ) ескертулері мен қоқан-лоққыларына қарамастан Самуд қауымының шонжарлары мен билері илаһи тәлімдердің өздерінің мүдделеріне қарсы көргендіктен, оның шақыруын қабылдамай, мүміндер арасында шүбә орнатуға әрекеттеніп: "Салих А...-ның елшісі ме екенін қайдан білесіңдер? Оны А... тағала жіберді ме және оның сөзі А...-ның сөзі ме екенін қайдан білесіңдер?",-деді. Бірақ олардың мүміндер арасында жүргізген мұндай улы үгіттері тиімсіз болды. Сонда мүміндер оларға батылдықпен: "Біз хазірет Салихтың пайғамбарлығына сенеміз. Мұнда, әсіресе бізге көрсеткен ұлы мұғжизасында ешқандай шүбә жоқ",-деді. Бірақ ақиқатты қабылдап, оған бағынғысы келмеген кәпірлер мен астамшылдар ашықтан-ашық: "Сендердің иман келтірген нәрселеріңе біз күпірлік етеміз",-деді. Осы аяттан үйренетініміз:

Біріншіден, тарих бойында пайғамбарларға қарсы шығып, оларға бағынбаушыларды әдетте ақсүйектер, байлар мен шонжарлар құрайды.

Екіншіден, кедейлік пен әлсіздік те, байлық пен билік те құндылық емес. Имандылық пен тақуалық маңызды. Бұл аят барлық әлсіздерді емес, әлсіз мұсылмандарды дәріптейді.

Үшіншіден, күпірліктің тамыры – тәкәппарлық пен өркөкіректік немесе астамшылдық пен дандайсушылық болып табылады.